Synopsis: The emergence of Donald Trump as a serious candidate for president has proved to be more than just showtime. It is likely to increase turnout at the polls, something that has not been seen in awhile. This does not
Synopsis: The emergence of Donald Trump as a serious candidate for president has proved to be more than just showtime. It is likely to increase turnout at the polls, something that has not been seen in awhile. This does not bode well for supporters of the Hawaiian independence movement.
• • •
Aloha mai nō kākou e ka poʻe puni koho pāloka. I loko nō o koʻu kūʻē ʻana i ka noho hewa mai o ʻAmelika i ko kākou moku i kēia mau lā, a ʻo ia kūʻē like nō i koʻu hoʻokolonaio ʻia ʻana e ua ʻo ʻAmelika, eia au ke hoʻomākaukau nei no ke koho ʻana i pelekikena no ia aupuni malihini e mahaʻoi mai nei ma kuʻu ʻāina aloha. E kupu mai ana nō paha kekahi nīnau no ke kumu aʻu e lawelawe ai i kēia hana, he hana hoʻi e kākoʻo ana i ua aupuni hoʻopunipuni nei. A eia mai nō kaʻu pane ma nā paukū i lalo nei.
I koʻu manaʻo, ʻaʻole au he makaʻāinana no ʻAmelika. Eia naʻe, i ka manaʻo o ʻAmelika, he makaʻāinana nō au nona. Ua koikoi ʻia mai au e uku i ka ʻauhau no ka pono o ʻAmelika a me ka Mokuʻāina ʻo Hawaiʻi, kona ʻākena a hoa like hoʻi. A no laila, ʻoiai ke ʻae mai nei ua aupuni hoʻokano nei i ia pono ʻo ke koho pāloka ʻana, na wai e ʻole ka mahalo, a na wai hoʻi e kāpae wale aku i ia pōmaikaʻi ma ka ʻaoʻao? Mai nō naʻe a kuhihewa mai ē he koho wale nō kaʻu e koho ai. ʻAʻole lā! E koho ana nō au i ka moho i emi loa kona kūʻē ʻana i kaʻu pahuhopu nui e kūlia nei, ʻo ia hoʻi, ke kūʻokoʻa maoli.
Kāhāhā! He kākaʻikahi wale nō ka poʻe nāna e mahalo i ka waiwai o kēia makana, ʻo ke koho pāloka. I kekahi mau makahiki ma Hawaiʻi nei, aia ka pākeneka o ka poʻe koho ma lalo loa o ke 50% o ka poʻe nona ia kuleana. A pēlā nō hoʻi ka liʻiliʻi o ka pākeneka ma ʻAmelika! Hoʻomaopopo aʻela au i kekahi makahiki, ua paʻi a paʻi nā koho i lilo iā Bush a me Gore, a ua puka naʻe ʻo Bush ma muli o ka nui aku o nā koho i loaʻa mai ma o ka “electoral college”. He poʻe ʻelele wale nō ia e like nō paha me nā ʻelele e koho ʻia nei no Naʻi Aupuni!
Ma muli naʻe o ke komo ʻana mai o Donald Trump ma ka holo pāloka ʻana no ke kūlana pelekikena, ke piʻi loa nei ka hoihoi o ka lehulehu. A piʻi ia hoihoi, piʻi pū nō me ka nui o ka poʻe e koho ana ma ke koho pāloka ʻana o kēia makahiki aʻe. No kona ʻano kaulana paha a no kona nānā ʻole ʻana i ka manaʻo o ka poʻe politika, ke ʻōʻili mai ʻo ia, ʻaʻole hiki i ka lehulehu ke pāweo maka, a ke haʻiʻōlelo mai, ʻaʻole hiki ke hoʻokuli. ʻO ia ke kumu i nui loa ai ka poʻe i nānā i ka paio ʻōlelo a nā moho Lepupalika ma ke kīwī i kēlā pule aku nei a i ia pule aku. Eia hou, ua ili mai kēlā hoihoi ma luna o kona mau hoa paio Kemokalaka i paio ʻōlelo maila i ka Pōʻalua nei.
Eia mai kaʻu e hopohopo nei. I ka piʻi ʻana o ka heluna o ka poʻe koho pāloka, e emi ana ka mana o kaʻu pāloka ponoʻī, a pēia pū hoʻi me kā nā hoa aloha ʻāina e ʻaʻa nei i ke koho. Ua kāʻili ʻia koʻu mau pono ma ke ʻano he kanaka kūʻokoʻa, a ma muli o Mika Huli, ke kāmau ʻia nei kaʻu pepa hoʻokahi i koe ma ka lima.
The weekly Hawaiian language column is coordinated by Kawaihuelani Center for Hawaiian Language at the University ofHawaii.
