Synopsis: The finalists of the Hoʻokūkū Mele A Moʻolelo, Poetry and Story Competition, are now online. Go to www.hawaiianliterature.com to listen to and vote for your favorite video. The winners will be announced at the beginning of September. ADVERTISING Synopsis:
Synopsis: The finalists of the Hoʻokūkū Mele A Moʻolelo, Poetry and Story Competition, are now online. Go to www.hawaiianliterature.com to listen to and vote for your favorite video. The winners will be announced at the beginning of September.
• • •
Welina e nā makamaka heluhelu. I ka nānā ʻana mai i ke poʻo manaʻo e kau aʻela i luna, e hao mai ana paha nā nīnau? ʻO wai ia mau mele hou, a ʻo wai hoʻi ia mau moʻolelo hou? Ma ka ʻōlelo Hawaiʻi paha a ma ka namu haole paha? Ma ka ʻōlelo Hawaiʻi nō, a ma muli ia o ka Hoʻokūkū Mele A Moʻolelo. ʻO ka makamua ia o nei hoʻokūkū. A e hoʻomau ʻia aku paha ma kēia hope aku. Akā, he mea maikaʻi ia no ka hoʻomāhuahua ʻana i nā mele a me nā moʻolelo ma ka ʻōlelo Hawaiʻi, a pēlā pū me ka hoʻoulu ʻana aku i ke kanaka e haku mele a e kākau paha i moʻolelo ma ka ʻōlelo Hawaiʻi.
ʻO ka nui o nā moho i komo ma ka māhele haku mele a me ka māhele kākau moʻolelo, ʻaʻole i hōʻike ʻia. Ma ka māhele haku mele, ʻo ka nui o nā moho i koe, he ʻehiku, ʻo Herman Kaʻimiloa Marciel, nāna ʻo Nā Wai Pana aʻo Kailua, ʻo Jacob Hauʻoli Elarco, nāna ʻo Ka Pua Siale, ʻo Liko Puha, nāna ʻo Hiehie ʻo Pāhala, ʻo Kaiponohea Hale, nāna ʻo Ka Laʻi o Nuʻuanu, ʻo Miʻilani Yoshiko Cooper, nāna ʻo No Kalaʻiuluwehi Ke Aloha, ʻo J. Hauʻoli Akaka, nāna ʻo Kīpuka Maluhia, ʻo Kapō Ku, nāna ʻo Nā Mākana, ʻo J. Hauʻoli Akaka, nāna ʻo Kauikeaolanamālie, ʻo Hualani Alford, nāna ʻo He mele no Pōlea, ʻo Collette L. Akana, nāna nā mele, ʻo Pā Mai Ka Lā, ʻo Kilakila ke Kuahiwi, ʻo Nani Wale Ka Wena O Ka ʻAlihi, ʻo He Malihini Mākou, a ʻo He Mele no Moana. Ma ka māhele kākau moʻolelo, he ʻehā moho i koe, ʻo Devin Kamealoha Forrest, a ʻo He Kaʻao no Kūwiliwilimakani ka moʻolelo, ʻo Manakō Tanaka, a ʻo He Weli Ko Ke Kai ka moʻolelo, ʻo Vanessa LeeMiller, a ʻo Ka ʻĀina Lēʻia ka moʻolelo, a ʻo Jon Yasuda, a ʻo Ke Kumu Wai Ola ka moʻolelo. Na nā luna loiloi e koho i nā lanakila. Akā, ma ka māhele wikiō mele, na ka lehulehu e koho i ka lanakila. A no laila, e nānā a e hoʻolohe i nā wikiō e kau ana. He nui nā mele i hoʻokomo ʻia i ka hoʻokūkū haku mele, akā, he ‘eono wale nō o lākou i hoʻokomo ʻia i loko o kēia māhele. A he ʻumi kumamākahi lā e koho pāloka ai. E koho pāloka.
Aloha ʻĀina. Ma Maui, ʻākoakoa aku nei kānaka, he mau haneli paha, ma ka Pā ʻo Maui Waena a ma ke Ala ʻo Crater no ke kūpaʻa ʻana ma hope o ka ʻāina. He mau kānaka aloha ʻāina nō lākou, a wahi a Kahoʻokahi Kanuha, kekahi o nā Hawaiʻi Alakaʻi, no nā mākaʻi, “Aia mākou i laila me ka lei laʻī. A aia kā lākou ala e komo ana i ka paʻa lole hoʻomalu haunaele, me he mea lā, e hele ana lākou i ke kaua.” He hana hoʻoweliweli ʻiʻo nō kā nā mākaʻi. ʻO ka nīnau nui, no ke aha lā lākou e hoʻoweliweli ai i ua mau kānaka aloha ʻāina nei. Ma ke Kapu Aloha nō ka hana ma ke kūpaʻa ʻana ma hope o ka ʻāina, a pēlā ihola ka hana a nā mākaʻi o Maui? He keu aku nō! Mahalo nui i ka poʻe aloha ʻāina i hiki aku i laila no ka hōʻike ʻana aku i ko lākou aloha ʻāina a me ke kūpaʻa ʻana, a pēlā pū ka mahalo i ka poʻe i hopu ʻia aku nei no ka pono o ka ʻāina.
The weekly Hawaiian language column is coordinated by Kawaihuelani Center for Hawaiian Language at the University of Hawaii.
