Ka Hale Hoʻoikaika Kino o nā Koa Ānuenue

Synopsis: The Warrior Recreation Center is a great gym with nice equipment.

•••

Welina e nā makamaka heluhelu. ʻO ka Hale Hoʻoikaika Kino o nā Koa Ānuenue ka mea e kamaʻilio æia i kēia lā, no ka mea, i ka wā i hemo ai, ka lā 11 o ka mahina ʻo ʻApelila, 2014, kuhi ihola ko ʻoukou mea kākau, ʻaʻole paha ʻo ia e hele iki aku i laila. ʻAkahi nō a hele aku ko ʻoukou mea kākau i laila i kēlā pule aku nei. Ua hele pū me kahi hoa kumu, ʻo Kaliko Baker, no ka mālama ʻana i nā papa ʻōlelo Hawaiʻi a māua, a ʻo ka pahuhopu, e ʻōlelo Hawaiʻi i ka wā e hoʻoikaika kino ai.

He keu aku ia wahi a ka nani! He ʻelua papahele o ia hale. I ke komo ʻana aku i loko o ka ʻīpuka, ma ka ʻaoʻao hema, he mau kahua pāʻani pōpō hīnaʻi, a he loaʻa nō hoʻi ka ʻupena pōpō paʻipaʻi, akā, ma ka Pōʻalua, ka Pōʻahā, a me ka hopena pule, ʻo ia ka wā e paʻa ai ka ʻupena (e nānā i ʻaneʻi no nā hola http://manoa.hawaii.edu/studentrec/fitnesscenter/hours.html). A ma kahi ʻaoʻao o ia mau kahua, aia kahi keʻena, kahi e mālama ʻia ai nā papa like ʻole. A i ke komo ʻana i loko o ka ʻīpuka o ia hale nani, a hala nā kahua pāʻani, he mau mīkini hoʻoikaika kino no nā mākala like ʻole. A he mau mīkini holo a piʻi mauna nō hoʻi.

Ma ka papahele ʻelua, he mau mīkini hou nō, a ma laila nō hoʻi ka pā hao. Puka i waho o ia keʻena hoʻoikaika kino, aia nō kahi mau mīkini holo, mīkini holo paikikala, mīkini piʻi mauna. Ua poina ihola paha kekahi mau mea, a no laila, e naue aku paha i laila e ʻike maka ai. ʻO ke kāki no ka poʻe haumāna o ke Kulanui o Hawaiʻi o Mānoa, he manuahi nō, inā ua uku ʻia kahi uku hele kula. Kohu mea lā, he pono ka pilina me ke Kulanui o Hawaiʻi no ka lilo ʻana i lālā, akā, hiki ke kūʻai ʻia ka palapala komo no ke hoa, he $10 o ka lā.

Ua maikaʻi wale ka hana a nā haumāna ma ka ʻōlelo Hawaiʻi, a ʻo kekahi mea maikaʻi, ʻo kekahi o lākou, ʻakahi nō a hele i laila i kēlā pule aku nei, e like me ko ʻoukou mea kākau.

Kaʻi Huakaʻi Aloha ʻĀina. I ka lā ʻapōpō, ka lā 9 o ʻAukake, ka Lāpule hoʻi, e naue aku i Waikīkī no ke kaʻi huakaʻi ʻana no ka hōʻike ʻana i ke alu like ʻana ma ke aloha ʻāina. E ʻākoakoa ana kānaka ma ke alanui ʻo Saratoga i ka hola 10:00 o ke awakea, a e kaʻi ana no Kapiʻolani Pāka. A ma Kapiʻolani Pāka, aia ana nā haʻi ʻōlelo, ka mea ai e kūʻai ai, nā puʻukani a pēlā aku a hiki aku i ka hola 4:00 o ka ʻauinalā. ʻO ka poʻe e kalaiwa ana, he hiki ke kūkulu ʻia ke kaʻa ma kahi kūkulu kaʻa B a me C o ke Kulanui Kaiāulu ʻo Kapiʻolani. A na kahi kaʻa halihali e lawe aku i ka mea kalaiwa a me nā ʻōhua. E hoʻomaka ka holo ʻana o nā kaʻa halihali i ka hola 8:00 o ke kakahiaka a e pau i ka hola 10:00 o ke awakea. No ka hoʻi ʻana i ke kaʻa, e hoʻomaka ka holo ʻana o ke kaʻa halihali mai Kapiʻolani Pāka aku a i ke Kulanui Kaiāulu ʻo Kapiʻolani, i ka hola 12:00 o ke awakea. A no ko Waiʻanae, e holo ana ʻelua kaʻa halihali kanaka mai ka Pāka Kahakai ʻo Māʻili a i ke alanui ʻo Saratoga. A he ʻelua kaʻa halihali hou, e holo ana mai ka Pāka Kahakai ʻo Nānākuli. He 50 noho o ke kaʻa halihali. A no laila, na ka ʻeleu mikimiki ka lawe lilo. E haʻalele nā kaʻa halihali i ka hola ʻehiku o ke kakahiaka. A e hoʻi aku ana ia mau kaʻa halihali ʻehā i Waiʻanae i ka hola ʻelima o ka ʻauinalā mai kahi kūkulu kaʻa o ka Pūpū o Waikīkī. Na QLCC a me ka Hale Mua O Maui i uku no ia mau kaʻa halihali.

The weekly Hawaiian language column is coordinated by Kawaihuelani Center for Hawaiian Language at the University of Hawaii.