Synopsis: Perhaps the legislature of Hawaii needs help in finding appropriate solutions for the homeless population on Oahu. Their current actions might not be sufficient.
Synopsis: Perhaps the legislature of Hawaii needs help in finding appropriate solutions for the homeless population on Oahu. Their current actions might not be sufficient.
Welina e nā makamaka heluhelu o Kauakūkalahale. I ka Pōʻahā nei, ua ʻāpono ʻia aku nei kekahi mau pila hou ʻelua e kahi kōmike o ka ʻAha Kūkā o Honolulu nei no ka holo ʻana i mua. ʻO ka mua, ʻo ka Pila 44, e hoʻonui ana i nā wahi e pāpā ʻia ai, ʻelua wahi hou, ʻaʻole e noho ʻia a e moe ʻia paha ka pīpā alanui o ia mau wahi. ʻO ka lua o ka pila, ʻo ka Pila 46, e pāpā ana ʻaʻole e hoʻomoana, ʻaʻole e hiamoe, a ʻaʻole hoʻi e kūkulu ʻia aku ka hale peʻa a me nā hana ʻē aʻe e pili ana ma ke kapa o nā kahawai a puni ʻo Oʻahu nei.
Kohu mea lā, ʻaʻole e ʻike ʻia nei ka hopena o ia ʻano kānāwai e nā luna ʻaha kūkā a i ʻole ia, he kaʻa kaua ia ma ka pāʻani kōnane. a e kali ana nā luna ʻaha kūkā, ʻo ka ʻike aku i kahi e lele aku ai kona hoa paio. A oki loa aku ka manaʻo o kekahi luna ʻaha kūkā, ʻo ia hoʻi, e hāpai hou ʻia kahi pila e pāpā ana, ʻaʻole e noho a e moe paha ma nā pīpā alanui a pau o Oʻahu nei.
E aho paha e noi aku i nā kānaka naʻauao o Oʻahu nei, mai ke nui a ka liʻiliʻi, i ka noʻonoʻo ʻana i mea e pono ai ka poʻe hale ʻole. A loaʻa ia mau haʻina, ʻo ia ka wā e waele aku ai a loaʻa ka mea kūpono.
Ua hauʻoli ko ʻoukou mea kākau i ka lohe ʻana no kahi wahi palekana e hemo ana, kahi e hiki ai ke noho ka poʻe hale ʻole e noho akula ma Kakaʻako, akā, ʻaʻole paha e lawa. No laila, inā e alu like nā luna kau kānāwai a me nā kānaka akamai a pau o Oʻahu nei, a o kēia pae ʻāina holoʻokoʻa paha, e loaʻa auaneʻi paha ka mea e pono ai kākou. I kekahi manawa, ʻo kekahi ʻano pilikia, he mea wāwahi pūniu nō ia, a no laila, he pono ke alu like ʻana e kō ai kahi ʻōlelo a kahiko, ʻo ia hoʻi, ʻaʻohe hana nui ke alu ʻia. A mai nō a poina e nā luna kau kānāwai i ke aloha kanaka.
Ka Hoʻokūkū Mele A Moʻolelo. ʻAuhea ʻoukou, e nā makamaka heluhelu, e hiki koke mai ana kahi lā kau palena e waiho ai i mele a i moʻolelo paha no ka Hoʻokūkū Mele A Moʻolelo. He hoʻokahi wale nō pule koe a hiki mai. ʻO ka lā 31 hoʻi ia o ka mahina nei ʻo Iulai, ka Lā Hoʻihoʻi Ea. E hōʻike mai i ko ʻoukou akamai ma ka haku mele a me kākau moʻolelo paha, a e lilo nō hoʻi ia i mea e nanea ai ka lehulehu ma ka hoʻolohe a me ka heluhelu paha. E lawa paha ka ʻike, he mea ia e luana ai nā kānaka like ʻole, akā, inā e koho ʻia ʻo kāu mea ka ʻoi ma kona māhele ponoʻī, e lilo aku kahi kenikeni i loko o kou pākeke. ʻO ka makana nō e lilo ana i ka lanakila o ka māhele haku mele a me ka māhele kākau moʻolelo, he $500. No laila, e waiho aku i kāu mele a i kāu moʻolelo paha ma www.hawaiianliterature.com. Aia i laila ka palapala e hoʻopihapiha ai. Mai kali a pau nā niho o hala aʻe ka Puʻulena.
The weekly Hawaiian language column is coordinated by Kawaihuelani Center for Hawaiian Language at the University of Hawaii.