Synopsis: Aloha showing strength in the Protect Mauna Kea movement.
Synopsis: Aloha showing strength in the Protect Mauna Kea movement.
•••
Aloha mai kākou e nā makamaka heluhelu, ua lohe ʻia paha ma mua ia ʻōlelo e kau aʻela i luna. He ʻōlelo noʻeau ia mai kahiko mai e hōʻike ana ē ʻoiai hiki ke aloha ʻia kahi puʻu, pehea hoʻi ke aloha ʻana i ke kanaka. He hiki ke like a ke ʻoi aku paha. I ka lohe ʻana i kekahi o nā haʻi ʻōlelo a Kahoʻokahi Kanuha i ka lā 9 o kēia mahina nei i luna o Mauna Kea no ke kapu aloha, kau aʻela ka noʻonoʻo o ko ʻoukou mea kākau i ua ʻōlelo noʻeau nei. He keu aku nā kūpuna a ke akamai. Ua maopopo, he nui ke aloha o nā kānaka i ka ʻāina, akā, ʻaʻole hiki ke poina ke aloha kanaka. I loko nō o ke aloha nui loa o kākou iā Mauna Kea, ʻo ke aloha ʻāina hoʻi, ʻaʻole e poina ke aloha kanaka. A e like me ka ʻōlelo a Kahoʻokahi, ʻo ia aloha (kapu aloha), ʻo ia paha ka mea i nui loa ai ke kākoʻo ʻana o kānaka a puni ka honua. Ua nui nō kāna mau ʻōlelo maikaʻi i ia lā, akā ma hope o kāna haʻi ʻōlelo ʻana, ua mele maila ʻo Hinaleimoana Wong-Kalu i kahi mele, a he mele nani wale ia a he maikaʻi nō no ka hōʻike ʻana i ke alu like ʻana. Na Hina nō i haku i ka makahiki 2007, akā, ʻakahi nō a lohe ko ʻoukou mea kākau. ʻO ka inoa o ua mele nani lā, ʻo ia hoʻi, ʻo Kū Haʻaheo E Kuʻu Hawaiʻi. A ua loaʻa nō hoʻi nei mele ma ka pūnaewele, http://kumuhina.tumblr.com/post/37020256496/ku-haaheo-e-kuu-hawaii-by-hinaleimoana. Mahalo e Hina, he mele maikaʻi wale ia.
A eia mai kekahi mau hana e mālama ʻia ana a puni ka honua, kahi e hōʻike ai i ke aloha ʻāina a me ke aloha hoʻi iā Mauna Kea. E naue aku paha i kekahi o ia mau hana a hōʻike i ke kākoʻo a me ke aloha ʻāina, ke aloha kupuna a me ke aloha kanaka.
Kiaʻi Mauna Kea ma Wāwāmalu. E ʻākoakoa ana kānaka ma Wāwāmalu i kēia lā, ka lā 25 o kēia mahina nei mai ka hola 10:00 o ke awakea a i ka hola 3:00 o ka ʻauinalā no ka hoʻolaha ʻana a me ke aʻo ʻana i ka laʻa o Mauna A Wākea. Ke noi ʻia nei kānaka i ka lawe i nā hōʻailona me nā ʻōlelo maikaʻi a pono no ke aʻo ʻana no Mauna A Wākea.
ʻO Mauna Kea mākou. He ʻaha mele kēia no ka pono o Mauna Kea. E mālama ʻia ana i ka lā 26 ko kēia mahina nei ma ka Hale Hana Keaka o Honokaʻa. He $20 o ke kikiki ke kūʻai ʻia ma mua o ia lā, a ke kūʻai ʻia i ka ʻīpuka, he $30. E hoʻomaka i ka hola 4:00 o ka ʻauinalā. ʻO nā puʻukani e hīmeni ana i laila, ʻo Amy Hanaialiʻi, ʻo Willie K, ʻo Paula Fuga, ʻo John Cruz a me Hawane Rios. ʻO nā pōmaikaʻi e loaʻa ana, e lilo ana no ke aʻo ʻana i nā mea e pili ana no Mauna Kea.
Kiaʻi Mauna Kea ma Pasadena. E ʻākoakoa ana kānaka ma Pasadena, Kaleponi i ka lā 29 o kēia mahina nei ʻo ʻApelila, he Pōʻakolu, mai ka hola 10:30 o ke awakea a i ka hola 12:30 no ke kūpaʻa ʻana ma hope o Mauna Kea. ʻO ka helu wahi, ʻo ia hoʻi, 1111 S. Arroyo Parkway, Pasadena, CA 91105.
Kū Kiaʻi Mauna. E mālama ʻia ana kahi ʻahamele i ka lā 23 o ka mahina ʻo Mei. Ma Hawaiian Brians, Oʻahu ana e mālama ʻia ai. E hoʻomaka ana i ka hola 9:00 o ke ahiahi. He ʻelima kālā e komo ai, a he pono ke piha nā makahiki he 18 i ke kanaka a ʻoi aku. ʻO nā pōmaikaʻi e loaʻa mai ana, e lilo ana no ka pono o Mauna Kea.
The weekly Hawaiian language column is coordinated by Kawaihuelani Center for Hawaiian Language at the University of Hawaii.